१५९ पाठक संख्या
सरकार र शिक्षक मुठभेटको नजिक पुगेका छन्। आज बिहान भक्तपुरमा बसेको बोर्डको बैठकले वैकल्पिक उपायबाट भएपनि शिक्षक कक्षा १२ को परीक्षा तोकिएको समयमा नै गर्ने निर्णय गरेपछि शिक्षक थप आक्रोशित भएका हुन्।
संघीय संसदबाट ऐन पारित नभएसम्म शिक्षकले आन्दोलन नरोक्ने बताएपछि सरकार पेलेरै अगाडि बढ्ने तयारी गरेको हो।
बोर्डका अध्यक्ष महाश्रम शर्माले परीक्षा नरोकिने र निर्धारित मितिमै हुने निर्णय भएको जानकारी दिए। तोकिएको समयमा नै परीक्षा गर्न विद्यार्थीहरूबाट पनि अनुरोध भएकाले परीक्षालाई सञ्चालन गर्न बोर्ड तयार रहेको उनले बताए। उनले परीक्षाका लागि केन्द्रसमेत तोकिएको अवस्थामा सहज रुपमा परीक्षा सम्पन्न गर्न सबैसँग पुनस् अनुरोध गर्ने निर्णय भएको जानकारी दिए।
त्यसलगत्तै आज दिउँसो बानेश्वरमा भएको आन्दोलनलाई सम्बोधन गर्दै शिक्षक महासंघका अध्यक्ष लक्ष्मीकिशोर सुवेदीले विद्यालय शिक्षा ऐन जारी नभएसम्म आन्दोलन निरन्तर जारी रहने बताए। उनले शिक्षकलाई परीक्षामा संलग्न नहुन निर्देशन दिए।
‘राष्ट्रिय परीक्षा बोर्डले निजामती कर्मचारी र सुरक्षाकर्मी परिचालन गरेर परीक्षा सञ्चालन गर्ने भनेको रहेछ। हामी कोही परीक्षामा सहभागी हुँदैनौं र केन्द्रमा निर्देशन दिन पनि म आग्रह गर्दछु। परीक्षा पनि उनीहरु नै लिउन्, कापी पनि उनीहरुनै जाँचुन्’ उनले भने।
शिक्षा ऐनमा अन्योल भइरहँदा सोमबार शिक्षामन्त्री विद्या भट्टराईले राजीनामा दिएकी छन्।
परीक्षा प्रभावित हुँदा करिब साढे पाँच लाख विद्यार्थीको परीक्षा अनिश्चित हुने भएकाले सरकार गम्भीर रुपमा लागेको बताइएको छ। आन्दोलनले एसईईको मूल्यांकन तथा नयाँ भर्ना प्रक्रियासम्मलाई अवरुद्ध गरिदिएको छ। प्रवेशपत्र हातमा बोकेका विद्यार्थी परीक्षा केन्द्र जाने, नजाने भन्ने अन्योलमा थिए।
चैत २० गतेदेखि देशभरबाट विद्यालयमा ताला नै लगाएर शिक्षक,कर्मचारी काठमाडौं आएका छन्। १२ बजेबाट ३ बजेसम्म आन्दोलन गर्दै आएका शिक्षकहरूले बिहान ९ बजेदेखि दिउँसो १२ सम्म आन्दोलन गर्न सुरु गरेका हुन्।
प्रतिक्रिया दिनुहोस