AP Khabar२०७५ चैत्र २८, बिहिबार (५ साल अघि)
३४८ पाठक संख्या चैत्र २८ राजधानीबाट प्रकाशित अखबारहरुले फरक–फरक विषयलाई प्राथमिकता दिएर समाचार प्रकाशित गरेका छन् ।
बुधबार जनतासमाचार डटकमले उद्योगपति दिवाकर गोल्छाको मृत्यु, डाक्टरहरुले वीर अस्पतालको आँगनबाट सेवा दिन थालेको, सगरमाथाको उचाइ नाप्नको लागि प्रधानमन्त्री केपी ओलीले एक टोलीको विदाई गरेको समाचार प्रकाशित गर्यो । यसका अलावा अन्य राजनीतिक, सामाजिक, मनोरञ्जनात्मक, साहित्यिक, आर्थिक तथा अन्तर्राष्ट्रिय र खेलकुदका प्रसङ्गहरुलाई समेटिएको थियो ।
‘नेपालले सगरमाथाको उचाइ नाप्ने’ शीर्षकमा आजको गोरखापत्र दैनिकमा समाचार छापिएको छ । समाचारमा प्रधानमन्त्री केपी ओलीले नेपाली आफैँले उचाइ मापन गर्दा सबैभन्दा आधिकारिक हुने बताउनुभएको उल्लेख गरिएको छ । यस्तै गृहमन्त्री रामबहादुर थापाले बंशजका आधारमा नागरिकता पाएका सन्तानहरुको नागरिकता पनि बंशजकै आधारमा गर्नुहोस् भनी ७७ वटै जिल्लाका प्रमुख जिल्ला अधिकारीलाई गरेको परिपत्रप्रति शंका नगर्न आग्रह गर्नुभएको छ । पत्रिकाकै पहिलो पृष्ठमा ‘ब्ल्याक होल’को तस्बिर सार्वजनिक शीर्षक दिएर तस्बिरसहितको समाचार छापिएको छ । यस्तै सामाजिक सञ्जालमा चलेको ‘ट्रयास च्यालेञ्ज’ सफाइका लागि लोकप्रिय बन्दै गएको समाचार पनि गोरखापत्रले पहिलो पृष्ठमा छापेको छ ।
राजधानी दैनिकले ‘बिरामीलाई बेवास्ता गर्दै १ सय २० घण्टादेखि आन्दोलनमा’ शीर्षकमा समाचार प्रकाशित गरेको छ । समाचारमा सरकारी चिकित्सकहरुले आन्दोलनले विरामी मारमा परेको प्रसङ्ग उल्लेख गरिएको छ । यस्तै स्थानीय तहमा १६ हजार कर्मचारी अझै पनि अभाव रहेको समाचारलाई पहिलो पृष्ठमा छापेको पत्रिकाले डलरको सञ्चिति अत्याधिक घटेको समाचारलाई पनि प्राथमिकता दिएको छ । त्यसैगरी एकै परिवारका पाँचजना अधिकृत भएको समाचार पनि राजधानी दैनिकले आफ्नो पहिलो पृष्ठको पुच्छारमा छापेको छ ।
‘मेलम्चीका १७ वर्ष ः २५ अर्ब लगानी, सवा २ अर्ब भ्रष्टाचार’ शीर्षकमा नयाँ पत्रिका दैनिकले समाचार प्रकाशित गरेको छ । समाचार स्थानीय जनताको सामाजिक उत्थानका नाममा एक अर्ब ८७ करोड भनिएता पनि त्यसले समाजमा कुनैपनि प्रभाव नपारेको स्थानीयको गुनासो छ । यस विषयमा महालेखा परीक्षकको कार्यालयले छानबिन गर्ने भएको छ । यस्तै प्रधानमन्त्री कार्यालय, खानेपानी मन्त्रालय, सहरी विकास मन्त्रालय, सेना, सशस्त्र र जनपथ प्रहरीहरुले मेलम्चीका विलासी गाडी चढ्ने गरेको समाचार पनि त्यसमै समावेश छ । त्यसैगरी प्रहरी क्याम्प बन्यो वीर अस्पताल शीर्षकमा प्रहरी र डाक्टरकोृ भीडको तस्बिरसहितको समाचार पनि नयाँ पत्रिका दैनिकले छापेको छ । यस्तै ४ मिनेट ढिलो हुँदा नेपाल एयरलायन्सको विमान उड्न नदिएको त्रिभुवन विमानस्थलले फ्लाई दुबईको जहाज भने १७ मिनेट ढिला उडेको प्रसङ्गलाई पनि पत्रिकाले समेटेको छ ।
कान्तिपुर दैनिकले ‘उडान भद्रगोल’ शीर्षकमास पहिलो पृष्ठमा तस्बिर र तथ्यसहित प्रकाशित गरेको छ । समाचारमा नोटाम जारी भएको १७ मिनेटपछि समेत फ्लाई दुबईलाई उडान अनुमति दिएको, ट्याक्सी वेमा पुगेको जेटको विमानमा पाइलटले इन्धन अभाव भएको जनाउँदै पुनः पार्किङकमा ल्याई तीन यात्रु थपेको र अघिल्लो मंगलबार राति २ सय ७४ यात्रुसहित दुबई उड्नुपर्ने निगमको वाइडबडी ११ घण्टापछि उडेको प्रसङ्गलाई समेटिएको छ । त्यसैगरी ‘सांसद्लाई अपरिचित निम्तो’ शीर्षकको समाचार लेखेको कान्तिपुरले प्रतिनिधिसभाको राज्यव्यवस्था तथा शुसासन समितिले संसद्मा विचाराधीन विषयमा परिपत्र नगर्न सरकारलाई निर्देशन दिएको समाचारलाई ‘समितिले गरायो सरकारलाई सचेत’ शीर्षकको समाचार प्रकाशित गरेको छ । त्यसैगरी दोलखामा पाहा माछा पाल्न थालिएको समाचार पनि पत्रिकाको पहिलो पृष्ठको पुच्छारमा छापिएको छ ।
अन्नपूर्ण पोस्टले ‘अन्ततः खिचियो ब्ल्याकहोल’ शीर्षकमा ब्ल्याकहोलको तस्बिरसहितको समाचार प्रकाशित गरेको छ । यस्तै पत्रिकाले सरकारी चिकित्सकहरुले बुधबार बीर अस्पतालमा सेवा दिएसँगै काममा फर्किएको समाचार छापेको छ । फ्लाई दुबईलाई चााहिँ १७ मिनेट शीर्षकमा समाचार प्रकाशित गरेको पत्रिकाले घरजस्तै खेलमैदान शीर्षकमा आठौँ राष्ट्रिय खेलकुदको छनौटलाई चित्रण गरेको छ । यस्तै सरकारले बाह्यशक्तिको हस्तक्षपकारी भूमिका बढ्दै गएको निष्कर्ष निकालेको समाचार पहिलो पृष्ठमा छापेको छ ।
‘राष्ट्रपतिको चीन भ्रमणमा पारवहन सम्झौतामा हस्ताक्षर’ शीर्षकको समाचार कारोबार दैनिकमा छापिएको छ । राष्ट्रपति विद्यादेवी भण्डारीले छिट्टै नै चीन भ्रमण गर्ने समाचार उल्लेख छ । दिवाकर गोल्छाको मृत्यु भएको समाचाचारलाई कारोबारले ‘रहेनन् औद्योगिक क्रान्तिका नायक’ शीर्षक दिएर छापेको छ । मलेसिया रोजगारीको लागि गरिने स्वास्थ्य परीक्षण अब सरकारी तथा निजी अस्पतालबाट नै गर्न सकिने भएको छ । समाचारमा यसअघि विभिन्न पोलीक्निक र मेडिकलहरुले स्वास्थ्य परीक्षणमा सिन्डिकेट लागू गर्दै आएता पनि अब भने त्यस्तो नरहेको उल्लेख छ ।
प्रतिक्रिया दिनुहोस