कमिसन वृद्धिको माग गर्दै ग्यास उद्योगीले आपूर्ति ठप्प पार्ने गरी हड्तालका कार्यक्रम घोषणा गरेका छन् । ६ वर्षदेखि उस्तै रहेको कमिसनदर बढाउन दबाब दिने उद्देश्यले हड्तालका कार्यक्रम सार्वजनिक गरेको बुधबार आयोजित पत्रकार सम्मेलनमा ग्यास उद्योग संघका अध्यक्ष गोकुल भण्डारीले बताए ।
संघले १६ फागुनसम्म उद्योगीले पाउँदै आएको कमिसनदरमा वृद्धि नगरे १७ फागुनबाट ग्यास खरिद नगर्ने जनाएको छ । त्यस्तै, २८ फागुनबाट देशभरका उद्योग बन्द गरेर आपूर्ति ठप्प पार्ने कार्यक्रम सार्वजनिक गरेको छ । ‘हामीले ग्यास बिक्री गर्दा पाउने कमिसन, ढुवानी खर्च, कर्मचारी तथा उद्योग सञ्चालन खर्चलगायतको दर ६ वर्षदेखि वृद्धि हुन सकेको छैन । यो अवधिमा सरकारलाई धेरैपटक वृद्धिका लागि पहल गरे पनि सुनुवाइ नभएपछि हड्ताल घोषणा गर्न बाध्य भएका छौँ,’ भण्डारीले भने ।
हाल प्रतिसिलिन्डर ग्यासको मूल्य १ हजार ४ सय रुपैयाँ निर्धारण गर्दा उद्योगीलाई २ सय ८१ रुपैयाँ ५ पैसा कमिसन र सञ्चालन खर्चबापत उपलब्ध गराइएको छ । यसमा कमिसन प्रतिसिलिन्डर ३२ रुपैयाँ दिइएको छ । उद्योगीले कमिसनदर मात्र बिक्री मूल्यको ५ प्रतिशत हुनुपर्ने माग गर्दै आएका छन् । त्यस्तै, खर्च पनि महँगी तथा इन्धनको मूल्य घटबढ भएअनुसार समायोजन हुनुपर्ने उनीहरूको माग छ ।
हडताल गरे कानुनी कारबाही हुन्छ : नवराज ढकाल, प्रवक्ता
उद्योग, वाणिज्य तथा आपूर्ति मन्त्रालय
व्यवसायीको मागहरू आज मन्त्रालयमा आइपुगेको छ । यो विषयमा अब हामी छलफल गरेर समाधान निकाल्ने प्रयास सुरु गर्छौंँ । जहाँसम्म हड्ताल गर्ने कुरा छ, ग्यास अत्यावश्यक वस्तु भएकाले हड्ताल गर्न निषेध गरिएको छ । त्यसैले, व्यवसायीले यसमा हड्ताल गर्छु भन्दैमा पाउँदैनन् । यदि हड्ताल गरे सरकारले कानुनी कारबाही गर्छ । तर, हामीले छलफल गरेर निकास निकाल्छौँ । हड्तालको स्थिति सिर्जना हुन दिदैनौँ ।
सधैँ हडतालको दम्भ
-१६ भदौ ०७४ मा नेपाली बुलेट सञ्चालनका लागि सरकारले तदारुकता नदेखाएको भन्दै उद्योग संघले हड्तालको चेतावनी दिएको थियो । उद्योगीले त्यतिखेर १५ दिनको समय दिएर नेपाली बुलेट सञ्चालन गर्ने वातावरण नबनाए ग्यास अभाव गर्ने त्रास देखाएका थिए । त्यतिखेर दसैँको मुखमा ग्यास अभावको त्रास देखाएका उद्योगीको मागपछि आयल निगम र तत्कालिन आपूर्ति मन्त्रालयले भारत गएर पहल गरेको थियो ।
-७ जेठ ०७३ मा ललितपुरको पाटनमा एचपी ब्रान्डको सिलिन्डर बिस्फोट भई ३ जनाको ज्यान गएको थियो । उद्योगको लापरबाहीका कारण ग्यास पड्किएको निष्कर्ष निकालेर आयल निगमले एचपीको खरिद आदेश अनुमति (पिडिओ) रोक्का गरेको थियो । यसो गर्दा उद्योगले भारतबाट ग्यास ल्याउन नपाई नयाँ सिलिन्डरमा ग्यास भर्न पाएको थिएन । तर, ग्यास उद्योग संघले एचपीको पिडिओ खुला नगरे सबै उद्योगले ग्यास बिक्री रोक्ने भन्दै ७ असारमा हड्तालको घोषणा गरेका थिए । त्यसपछि निगमले बजारमा ग्यासको अभाव हुने त्रासका कारण एचपीको पिडिओ खुला गर्न बाध्य भएको थियो ।
-०७१ को दसैँमा सबै उद्योगले बढी ग्यास आपूर्ति गर्न पाउनुपर्ने माग राखेर हड्तालको चेतावनी दिएका थिए । निगमले कोटा वृद्धि गर्न सुरुमा मानेन । तर, जाडो बढ्दै गएपछि माग बढेका कारण कोटा वृद्धि गर्यो ।
-उद्योगीले मागेजति कमिसन वृद्धि गर्न ०६९ र ७० को दसैँअगाडि ग्यास आपूर्ति ठप्प पारेका थिए । दसैँजस्तो विशेष चाडमा आपूर्ति ठप्प पारेर उपभोक्तालाई सास्ती दिएपछि सरकारले आफ्ना माग पूरा गर्ने उनीहरूको उद्देश्य थियो । ०६९ को दसैँमा माग पूरा भएन । दोस्रोपटक ०७० को दसैँमा उद्योगीले आपूर्ति ठप्प पारेर दबाब दिएपछि सरकारले कमिसन वृद्धि गरेर प्रतिसिलिन्डर ३२ रुपैयाँ पुर्याइदिएको थियो । हालसम्म सोही कमिसनदर लागू छ ।
nayapatrika
प्रतिक्रिया दिनुहोस