बैशाख २५
पूर्वी चितवनको राप्तीमा बुधवार बिहान एक समूहले चोरी गर्ने क्रममा कुटपिट गर्दा वृद्ध दम्पती घाइते भएका छन् ।
जिल्ला प्रहरी कार्यालय चितवनका अनुसार राप्ती नगरपालिका–७ बस्ने ७६ वर्षीय ओम शर्मा पोखरेलको घरमा आज बिहान करीब २ बजे दुई जनाको समूहले मास्क लगाएर चोरी गर्ने क्रममा पोखरेल दम्पतीलाई कुटपिट गरेका हुन् । सो क्रममा पोखरेल र उनकी ६५ वर्षीया श्रीमती मनरुपा घाइते भएका छन् ।
उनीहरूको भरतपुर अस्पतालमा उपचार भइरहेको छ । मनरुपाको कानको गहना लुट्ने क्रममा कानको लोती चुँडिएको प्रहरीले बताएको छ । उनीहरूको साथबाट रिङ र सिक्री गरी करीब दुई तोला सुन लुटिएको प्रहरीले जनाएको छ । पोखरेल दम्पतीको अवस्था खतरामुक्त रहेको र चोरी गर्ने समूहको खोजीकार्य भइरहेको जिल्ला प्रहरी कार्यालय चितवनका प्रहरी प्रहरी नायब उपरीक्षक दुर्गाराज रेग्मीले जानकारी दिए ।
प्रतिक्रिया दिनुहोस