असोज मसान्तबाट सुरु भएको झरीका कारण भित्रिने बेला भएका धानबालीमा निकै असर परेको छ ।
गत ४ दिन देखीको लगातारको बर्षातले तराईका खेतबारीमा पाक्न लागेका तथा दाना लाग्दै गरेका धान बालीमा ठूलो क्षती भएको छ । पाकेका धान पानीमा डुबेका छन्, काटिएका धान बगाएका छन् भने भर्खर दाता पस्दै गरेका धानका बालाहरु ढल्दा किसानहरु निकै मर्कामा परेका छन् । गत बर्ष पनि बिभिन्न कारणले तराईका अधिकांश स्थानमा धान उत्पादन घटेको थियो । झन् यस बर्ष त काट्ने बेला भएका भदौरे लगाएतका धान पुरै पानीले बर्बाद पारेको बाराको जितपुरसिमरा उपमहानगरपाली ४ का किसान लाल चौधरीले गुनासो गर्नुभयो ।
किसानहरुमा भर्खर दाना पोसाउदै गरेका धानमा समेत अहिलेको पानीले दाना नलाग्ने चिन्ता बढेको छ । समयमा मल नपाउने समस्या, बिभिन्न रोगब्याधि आदिबाट जोगाउदै उव्जाईएका धान यसरी बर्बाद हुदा किसानहरु बर्षेनि ऋणमा डुब्दै आएका छन् ।
यस बर्ष ज्येष्ठ महिनादेखी नै अत्याधिक बर्षा भैरहेको छ । धान रोप्ने बेलामा आकाशको पानीमै धान रोप्न पाएका किसानले यसबर्ष धानको राम्रो उत्पादन हुने अपेक्षा राखेका थिए ।
हरेक तवरबाट पिडित किसानहरुका लागी स्थानिय सरकार वा अन्य सरोकारवाला निकायले समेत कुनै सहुलियत प्रदान गरेको पाईदैन । जुनसुकै पालीकामा पनि किसानको संख्या अत्याधिक छ । तिनै किसानको भोट पाएर जनप्रतिनिधि बनेकाहरुले ति किसानहरुलाई बाली उत्पादन बढाउन सहयोग गर्नु अथवा दुर्घटना पश्चात क्षतीपुर्ती दिन त परको कुरा पानिले डुबेको धान उठाउदै गरेका किसानहरुको सम्मुख भएर हामीले के सहयोग गरौं ? भनेर सोध्ने सम्म पनि कष्ट गर्दैनन् ।
पानीले धानबालीमा मात्रै हैन तरकारीको बिउमा पनि क्षति पु¥याएको छ । खेतमा तोरी छरिसकेका किसानको बिउ खेर जाने भएको छ । किसानलाई परेको मर्काका बारेमा तीनै तहको सरकारले ध्यान दिनुपर्ने उनिहरुको माग छ । अहिले धानबालीमा पुगेको क्षतिको मुल्यांकन गरेर नगद राहत पाउनुपर्ने माग किसानको छ ।
प्रतिक्रिया दिनुहोस