तिहार मनाउन उपत्यबाट बिभिन्न जिल्लाहरुमा जाने यात्रुहरुको संख्या ह्वात्तै बढेको छ ।
जसको सुमो चालक तथा ब्यवसायीहरुले फाईदा उठाईरहेका छन् । तिहार र छठ मनाउन बिषेशतः बारा, पर्सा रौतहट लगाएत तराईका जिल्लाहरुमा आउने यात्रुहरु पछिल्लो केहिदिन यता बल्खुमा थुप्रै भेटिन्छन् । सिमित सुमो सेवा तथा यात्रुहरुको संख्या धेरै हुने यि चाडबाडको समयमा यात्रुहरु बाध्यताबस जानाजान ठगिईरहेका छन् ।
सामान्यतः बल्खुदेखी रौतहटको चपुरसम्मको भाडा ६ सय रुपैया तिर्ने सर्मिला थापाले १ हजार रुपैया भाडा तिर्नुपुरेको बताउनुभयो । भाडादर एक हजारदेखी १२ सय रुपैया सम्म पुगेको थापाले सुनाउनुभयो । “जहाज चढ्न झन् महंगो पर्छ, अरु विकल्प छैन त्यसैले बिरगञ्ज सम्मको भाडा १५ सय रुपैया तिरेर पनि आए” छठ मनाउन आफ्नो घर आएका उमेश साह कानुले बताउनुभयो । हरेक बर्ष चाडबाडमा यस्तो समस्या भोग्ने धेरै यात्रुहरु छन् ।
यस बिषयमा सुमो ब्यवसायी भन्छन्, “गाडिमा सिट क्षमताकै यात्रु बोक्नु प¥यो, बल्खुबाट यात्रु पाईन्छ तर जादा खाली जानु पर्छ ।” कलंकी र कोटेश्वर नाकामा पनि ब्यवसायीले आउँदा यात्रु नहुने भन्दै दोब्बर भाडा असुलिरहेको यात्रुले गुनासो गरेका छन् ।
यातायात व्यवस्था विभाग, यातायात व्यवसायी संघहरु, ट्राफिक प्रहरीले चाडबाडका बेला यात्रुको सहजताका लागि ‘हेल्प डेस्क’ समेत राख्ने गरेका छन् । तर, बढी भाडा असुल्ने, भएका गाडी लुकाएर कृत्रिम अभाव सिर्जना गर्ने र दोब्बर भन्दा बढी भाडा उठाइसकेपछि मात्र गाडी बस पार्कमा ल्याउने जस्ता कार्य खुलेआम रुपमा भइरहेको यात्रुले बताउने गरेका छन् ।
प्रतिक्रिया दिनुहोस