४३३ पाठक संख्या वीरगञ्ज ३० साउन : वीरगञ्जको नारायणी अस्पतालका प्रयोगशालामा दुई डाक्टरसहित थप ४९ जनामा कोरोना भाइरस संक्रमण देखिएको छ ।
बिहीबार राति प्रयोगशालामा गरिएको पिसीआर परीक्षणमा ४९ जना नयाँ र एक जना संक्रमित व्यक्तीको दोश्रो पटकमा पनि संक्रमण देखिएको नारायणी अस्पतालका प्रमुख मेडिकल सुपरिडेन्टेन्ट डा. मदन उपाध्यायले जानकारी दिए । उनको अनुसार नयाँ संक्रमित हुनेमा १२ जना महिला र ३७ जना पुरुष रहेका छन् ।
थपिएका नयाँ संक्रमितमा दुई वर्षीय बालकदेखि ५३ वर्षसम्मका रहेका छन । संक्रमित पुष्टि हुनेमा २६ जना पर्साका, २० जना बाराका , दुई जना महोत्तरीको जलेश्वर नगरपालिका र एक जना वीरगञ्जस्थित भारतीय महावाणिज्य दूतावासमा कार्यरत कर्मचारी रहेका छन् ।
संक्रमितमध्ये सबैभन्दा धेरै बाराको जीतपुर सिमरा उपमहानगरपालिकाका १९ जना रहेका छन् । सो उपमहानगरपालिकाको वडा नं. १४ देखि वडा नं. २५ सम्मका व्यक्तिमा संक्रमणको पुष्टि भएको छ भने पर्साका २६ जना संक्रमितमध्ये १२ जना नारायणी अस्पतालका चिकित्सक, स्वास्थ्यकर्मी र कर्मचारी रहेका छन् ।
नारायणी अस्पतालको एनआईसीयू विभागका एक चिकित्सक, पोषण, फार्मेसी र फिजियोथेरापी विभागका एकरएकजना स्टाफमा कोरोना देखिएको हो । अस्पतालका ३ जना स्विपर, ३ जना सुरक्षा गार्ड र एक जना कार्यालय सहयोगीमा पनि कोरोना संक्रमण पुष्टि भएको छ ।
ग्लोबल आईएमई बैंकका एक जना कर्मचारीमा पनि कोरोना संक्रमण देखिएको छ भने जितपुरस्थित आर्मी ब्यारेकका एक जवान पनि रहेको छन ।
प्रतिक्रिया दिनुहोस