३५९ पाठक संख्या बाँकेका विभिन्न आइसोलेसन सेन्टरबाट बुधबार ७३ जना कोरोना संक्रमणमुक्त भएर घर फर्किएका छन् । स्वास्थ्य कार्यालय बाँकेका अनुसार दिनदिनै ठुलो संख्यामा संक्रमितहरु निको भएर घर फर्किने क्रम बढेपछि संक्रमित निको हुने दर बढेर ८० प्रतिशत पुगेको छ ।
यसअघि केही दिन पहिलेसम्म जिल्लामा निको हुने दर ७३ प्रतिशत रहेको थियो । बाँकेका कोरोना सम्पर्क व्यक्ति नरेश श्रेष्ठले बुधवार ७३ जना निको भएर घर फर्किएसँगै जिल्लामा निको हुनेहरु संख्या १ हजार ३३७ जना पुगेको बताए । बाँकेमा हालसम्म १ हजार ६७४ जनामा संक्रमण पुष्टि भएकोमा १ हजार ३३७ जना निको भएर घर फर्किएका छन् ।
जिल्लाका विभिन्न आइसोलेसन तथा होमआइसोलेसनमा अझै पनि ३२६ जना संक्रमितको उपचार भईरहेको स्वास्थ्य कार्यालयले जनाएको छ । सो कार्यालयका अनुसार जिल्लामा ११ वटा क्वारेन्टाइन र १७ वटा आइसोलेसन सेन्टरहरु सञ्चालनमा रहेका छन् । क्वारेन्टाइनमा ७६ जना रहेको पनि उक्त कार्यालयले जनाएको छ ।
प्रतिक्रिया दिनुहोस