AP Khabar२०७६ बैशाख १७, मंगलबार (५ साल अघि)
२९९ पाठक संख्या बैशाख १७ नेपाल कम्युनिष्ट पार्टी नेकपा संसदीय दलको बैठक आज बस्दैछ । सरकारले आगामी शुक्रबार वार्षिक नीति तथा कार्यक्रम सार्वजनिक गर्ने भएपछि सत्ता नेतृत्वकर्ता दल नेकपाले आज सांसदहरुसँग छलफल गर्न लागेको हो ।
संघीय संसदको तेस्रो अधिवेशन लगत्तै चैतको दोस्रो साताबाट स्थानीय तहमा परिचालन भएका सांसदहरुले आज जनस्तरबाट प्राप्त सुझाव दलको बैठकमा प्रस्तुत गर्नेछन् । बैठक दिउँसो एक बजे काठमाडौंको नयाँ बानेश्वरस्थित संसद भवन परिषरमा बस्नेछ । प्रधानमन्त्री समेत रहेका अध्यक्ष केपी शर्मा ओलीले सरकारको वार्षिक कार्यक्रममा समावेश गर्ने गरी जनताको सुझाव संकलनका लागि गाउँ जान संसदको तेस्रो अधिवेशन लगत्तै सांसदहरुलाई निर्देशन दिएका थिए । आवश्यक छलफल बिना नै सरकारले नीति तथा कार्यक्रम ल्याउन लागेको भन्दै प्रमुख प्रतिपक्ष कांग्रेसले आपत्ति जनाईरहेका बेला सरकारले जनताकै सुझाव संकलनको पहल भएको दाबी गरेको छ ।
संघीय संसदको आगामी शुक्रबार अपरान्ह ४ बजे बस्ने संयुक्त बैठकमा राष्ट्रपति विद्यादेवी भण्डारीले सरकारको वार्षिक नीति तथा कार्यक्रम सार्वजनिक गर्ने कार्यसूची तय भएको छ । नेकपा संसदीय दलका मुख्य सचेतक देव गुरुङले बैठकमा प्रधानमन्त्री ओली र अर्का अध्यक्ष पुष्पकमल दाहालले सांसदहरुलाई आवश्यक निर्देशन दिने जानकारी दिए ।
प्रतिक्रिया दिनुहोस