बैशाख २०
सङ्घीय मामिला तथा सामान्य प्रशासनमन्त्री लालबाबु पण्डितले आगामी एक हप्ताभित्रै कर्मचारी समायोजनको सम्पूर्ण काम सम्पन्न गरिसक्ने बताएका छन् । शुक्रवार काठमाडौँमा आयोजित साक्षात्कारमा बोल्दै मन्त्री पण्डितले प्रशासनिकतर्फको कर्मचारी समायोजनको धेरैजसो काम सम्पन्न भैसकेको बताए ।
मन्त्री पण्डितले मुलुक यति बेला सङ्घीयता कार्यान्वयनको चरणमा रहेकोले सरकार त्यसतर्फ सचेत भएर अघि बढिरहेको पनि बताएका छन् । सङ्घीयता कार्यान्वयनका कामहरू अघि बढाउँदा केही अप्ठ्याराहरू आएपनि वर्तमान सरकारले बढो जिम्मेवार ढङ्गले कामहरू सम्पन्न गरिरहेको पनि मन्त्री पण्डितको भनाई छ । समायोजनको विषयमा कर्मचारीहरूले उठाएका र राखेका जायज गुनासाहरूलाई सरकारले सम्बोधन गरेको पनि उनले बताए । त्यस्तै, फरक क्षमता भएका लगायतका अन्य कर्मचारीहरूको पनि आफूहरूले उचित व्यवस्थापन गर्ने मन्त्री पण्डितले विश्वास दिलाए । उनले स्थानीय तहको सवालमा पनि यो वर्षको असार मसान्तभित्रै कर्मचारीको सबै व्यवस्थापन भइसक्ने दाबी गरेका छन् ।
उनले प्रदेश लोकसेवा आयोग गठन नहुञ्जेलसम्म केन्द्रले कर्मचारी भर्नाको आवश्यकता गर्ने भएकोले आउने हप्ताभित्र स्थानीय र प्रदेश तहको लागि कर्मचारी आवश्यकत्ताको लागि विज्ञापन गरिने जानकारी दिए । वर्तमान सरकारले अघि सारेको ‘सुखी नेपाली, समृद्ध नेपाल’ को नारा साकार हुने दिशातर्फ मुलुक अघि बढिरहेको उनको भनाई छ ।
प्रतिक्रिया दिनुहोस