असार २२
टेलरिङ व्यवसायको आडमा ललितपुर महानगरपालिका ११ मा लागुऔषध कारोवार गर्दै आएका दम्पतीलाई लागुऔषध नियन्त्रण व्युरो कोटेश्वरको टोलीले पक्राउ गरेको छ । विशेष सूचनाको आधारमा रामेछापको दोरम्बा गाउँपालिका ७ का २५ वर्षीय सुरेन नगरकोटी र उनकी श्रीमती २१ वर्षीया अजिता गुरुङलाई पक्राउ गरेको व्युरोका प्रवक्ता एसपी कृष्ण प्रसाईंले जानकारी दिए । ललितपुर महानगरपालिका ११ मा संचालन गरेको टेलरिङ पसलमा लुकाएर राखेको अवस्थामा ठूलो परिमाणमा लागुऔषध बरामद भएको उनले बताए ।
प्रहरीले पसलबाट डाईजेपाम १७८३ एम्पुल, बुप्रोनोर्फिन २१२१ एम्पुल र फेनारगन १२०१ एम्पुल बरामद गरेको जनाएको छ । विभिन्न ब्राण्डका ३६ वटा मोवाइल, तीन थान आइप्याड र एक लाख ५० हजार नगदसमेत बरामद भएको प्रसाईंले बताए ।
प्रारम्भिक अनुसन्धानबाट नगरकोटी लामो समय देखि लागू औषधको कारोबार गर्दै आईरहेको खुलेको छ । बरामद भएका मोवाइल सेट र आइप्याड लागु औषध सेवनकर्ताकाे भएकाे प्रहरीले जनायाे । ‘लागुऔषध सेवन गरेवापत धरौटीमा राखिएका मोवाइल सेट भएको खुलेको छ,’ प्रसाईले भने् ।सभार नयाँ पत्रिका
प्रतिक्रिया दिनुहोस