नरेश सराफ
साउन ०२ पर्सा : प्रहरीले लागूऔषधसहित वीरगन्जको बगहीबाट चार जनालाई पक्राउ गरेको छ ।
प्रहरीले लागूऔषध १२० किलो गाँजासहित सर्लाहीको लालबन्दी नगरपालिका १७ का २१ वर्षीय रमेश लामिछाने, २० वर्षीय डम्मरमणी घिमिरे, पर्साका पटेर्वासुगौली गाउँपालिका ४ का ४२ वर्षीय प्रेम दास र सखुवाप्रसौनी गाउँपालिका ६ का ३५ वर्षीय राजेश खवासलाई पक्राउ गरेको हो ।
विशेष सूचनाको आधारमा बुधबार राती उनीहरुलाई पक्राउ गरिएको प्रहरीले जनाएको छ । पक्राउ परेकामध्ये लामिछाने कार चालक र दास मोटरसाईक चालक हुन् ।
बिआर ०१ डिबी ०००३ नम्बरको भारतीय कारको डिकीमा लागूऔषध गाँजा लुकाइछिपाई सर्लाही तर्फ लैजादै गरेको अवस्थामा वीरगन्ज महानगरपालिका २८ बगहीबाट उनीहरुलाई पक्राउ गरिएको पर्साका प्रहरी उपरिक्षक सोमेन्द्र सिंह राठौरले बताए ।
बरामद गरिएको गाँजा मकवानपुरबाट खरिद गरी पर्साको राष्ट्रिय निकुञ्ज जंगलको बाटो प्रयोग गरी पर्सामा भित्रिर्याएको थियो । पर्सामा भित्रिर्याएको गाँजा सर्लाही तर्फ लैजाने क्रममा उनीहरुलाई पक्राउ गरिएको प्रहरीले जनाएको छ ।
गाँजा बोकेको कारलाई स्कटीङ्ग गरिरहेको ना २४ प ८७६४ नम्बरको मोटरसाईकलसहित उनीहरुलाई पक्राउ गरिएको प्रहरी उपरिक्षक राठौरले बताए । पक्राउ परेका चारै जनालाई लागूऔषध मुद्दामा जिल्ला अदालत पर्साबाट म्याद थप गराई थप अनुसन्धान गर्ने काम भइरहेको उनले बताए ।
प्रतिक्रिया दिनुहोस