८३ पाठक संख्या मलेसियाको क्वालालमपुरबाट काठमाडौं फर्किन लागेको नेपाल वायुसेवा निगम (नेपाल एयरलाइन्स)को न्यारोबडी विमान मलेसियाको क्वालालमपुर अन्तर्राष्ट्रिय विमानस्थलमा ग्राउन्डेड गरिएको छ ।चालकदललाई आवश्यक पर्ने अक्सिजन अभावले विमान ग्राउन्डेड गरिएको हो । त्यहाँबाट नेपाली सयमअनुसार बिहान ३ बजे उड्नुपर्ने जहाज अहिलेसम्म नउडेको बताइएको छ ।
काठमाडौं फर्किन लागेको विमान विमानस्थलमा नै ६ घण्टादेखि रोकिए पछि १ सय ५२ यात्रु अलपत्र परेका छन् । यसअघि नेपाल वायुसेवा निगमको दुई वटा न्यारोबडी जहाजमा समस्या आएपछि काठमाडौंमा दुई जहाज ग्राउण्डेड भएका थिए । न्यारोबडी जहाज ९ एन-एकेडब्लु एक साता अघि र ९-एकेएक्स शनिबार समस्या आएपछि ग्राउण्डेड भएको थियो । सोही मध्य मर्मत गरेर सोमबार राति १० बजे मलेसिया उडेको जहाज उतै ग्राउन्डेड भएको हो । निगमका प्रवक्ता रमेश पौडेलले अहिले अक्सिजन उपलब्ध भइसकेको बताउँदै जहाज चाँडै काठमाडौं फर्किन लागेको बताए ।
प्रतिक्रिया दिनुहोस