३०६ पाठक संख्या काठमाडौँ– काठमाण्डौको नयाँ बानेश्वरस्थित मातृका आँखा अस्पतालमा नक्कली बम राख्ने तीन जनालाई प्रहरीले पक्राउ गरेको छ । त्यहाँ कार्यरत डाक्टरसँग अवैध असुली गर्ने नियतले तीनजनाले उक्त आँखा अस्पतालमा नक्कली बम राखेको बुझिएको छ ।
प्रहरीले उक्त घटनामा संलग्न भएको आरोपमा धादिङ त्रिपुरासुन्दरी गाउँपालिका–३ घर भई फुटुङ बस्ने २५ वर्षका आशीष कुँवर, २० वर्षका अभिषेक कुँवर र रोल्पाको परिवर्तन गाउँपालिकाका ४० वर्षीय अम्बरबहादुर रोका मगरलाई पक्राउ गरेको हो ।
महानगरीय प्रहरी परिसर काठमाडौँमा आयोजित पत्रकार सम्मेलनमा आइतबार आरोपीहरूलाई सार्वजनिक गरिएको हो । भदौ २५ मा आँखा अस्पतालमा उनीहरूले राखेको भनिएको ‘बम’ सेनाको टोलीले निष्क्रिय बनाएको थियो । प्रहरीले पक्राउ गरेको आशिष र अभिषेक सहोदर दाजुभाइ हुन् ।
१ महिनाअघि आशिष मातृका आँखा अस्पतालमा आँखाको उपचार गराउन गएका थिए । त्यहाँ आँखाको लेन्स फेरे, ८० हजार खर्च गरेर फर्किए । उक्त अस्पतालमा आँखा जाँच्न जाने क्रममा आशीषले घटनाको योजना बनाएका थिए । विदेश जाने तयारीमा रहेका दाजुभाई म्यानपावरको खर्च पु¥याउन अस्पताललाई धम्काएर फिरौती लिने योजनामा पुगेको उनिहरुले स्विकारेका छन् ।
आरोपीहरूले अस्पताल सञ्चालकसँग ३ करोड फिरौती मागेको महानगरीय प्रहरी परिसर काठमाडौँका प्रवक्ता (एसपी) रमेश बस्नेतले जानकारी दिनुभयो ।
प्रतिक्रिया दिनुहोस