अमित ठाकुर २०७९ कार्तिक १७, बिहिबार (१ साल अघि)
१९३ पाठक संख्या प्रतिनिधि सभा सदस्यका लागी रौतहटको क्षेत्र नंं १ बाट गठबन्धनका तर्फबाट उम्मेदवारी दिएका पूर्व प्रधानमन्त्री माधव कुमार नेपाल र पूर्व मेयर अजय गुप्ता बिच प्रतिष्पर्धा हुने भएको छ ।
नेकपा एकीकृत समाजवादीका अध्यक्ष माधव कुमार नेपालसँग प्रतिष्पर्धामा रहेका नेकपा एमालेका उम्मेदवार अजय गुप्ता चुनावी रणनितिका साथ अगाडी बढि रहेका छन । दुवै उम्मेदवारले मतदातालाई आफ्नो पक्षमा पार्न घरदैलो, कोणसभा लगायतका कार्यक्रमहरु गरिरहेका छन ।
रौतहटबाट निर्वाचित भएर प्रधानमन्त्री समे भइसकेका नेता नेपाललाई गठबन्धनका उम्मेदवारहरुले पनि सघाइरहेको छन । तर नेता नेपाललाई यसभन्दा पहिले मत दिएका स्थानियले यस पटक गुनासो बढी गरिरहेका छन । प्रधानमन्त्री समेत बनेका व्यक्तिले जिल्लामा समुचित विकास गर्न नसकेकोमा स्थानीयको गुनासो छ । खास गरी जुद्ध माध्यमिक विद्यालयको छात्रावास तथा बाग्मती नदीको पुल निर्माण गराउन नसकेको भन्दै स्थानीयले दुखेसो गरेका छन ।
दोश्रो संविधानसभा निर्वाचनमा माधव कुमार नेपाल संग तिन सय मतले पराजित भएका एमालेका नेता गुप्ताले यो चुनावमा नेपाललाई कडा चुनौती दिने भएका छन् । गुप्ताले आफ्नो जितका लागि यतीबेला भेटघाटलाई तिब्र पारेका छन । एमालेका तर्फबाट क्षेत्र नं. १ को क बाट राजकिशोर यादवसँगको सहकार्यमा गुप्ताले घरदैलो कार्यक्रममा जोड दिइरहेका छन भने एकीकृत समाजवादीका नेता नेपालले पनि गठबन्धनका उम्मेदवारहरुसँग घरदैलो कार्यक्रममा व्यस्त छन ।
दुवै नेतालाई सुनिरहेका स्थानिय भने अहिलेनै कसैको पक्षमा खुल्न चाहदैनन । घरदैलोमा आएका नेताहरुको आश्वासन र तर्कहरु सुन्दै उनीहरु मंसिर ४ मा आफ्नै स्वविवेकले मतदान गर्ने बताउछन ।
एमालेका नेता अजय गुप्ता र गठबन्धनका तर्फबाट नेकपा समाजवादीका उम्मेदवार माधव नेपाल दुवैले आफुहरुलाई स्थानियको सर्मथन रहेको दाबी गर्छन ।
प्रतिक्रिया दिनुहोस