अखिलेश कुमार यादव २०८० चैत्र ३, शनिबार (१ महिना अघि)
१९१ पाठक संख्या बारा : बाराको जितपुरसिमरा उपमहानगरपालिकामा दक्ष खेलाडी उत्पादन गर्ने लक्ष्यसहित प्रथम जितपुरसिमरा क्रिकेट कप आज देखि सुरु भएको छ । शनिवार एक कार्यक्रमको बीच जीतपुरसिमरा उपमहानगरपालिकाका नगर प्रमुख राजन पौडेल ब्याटिङ्ग र उपप्रमुख भोला प्रसाद अधिकारिले बवलिङ्ग गर्दै प्रतियोगिताको उद्घाटन गरेको छ ।६ वटा टिमको सहभागिता रहने प्रतियोगिताको विजेताले नगद एक लाख र उपविजेताले ५० हजार प्राप्त गर्नेछन्। प्रतियोगिताको उत्कृष्ट ब्याट्सम्यान, उत्कृष्ट बलर र उत्कृष्ट खेलाडीलाई जनही १० हजार रुपैयाँ प्रदान गरिनेछ।
विगत केही महिनादेखि जितपुरसिमरा उपमहानगरपालिका क्रिकेटमय बनेको छ। जीतपुरसिमरा उपमहानगरपालिकाले खेलकुदमा २ करोड ५४ लाख लगानी गरे पनि लगानी अनुसार प्रतिफल नआएकोले अब बिद्यालय स्तरीय खेलकुदमा लगानी गरिने नगर प्रमुख राजन पौडेलले बताए । जीतपुरसिमरा उपमहानगरपालिकाको सहयोग र अभियान नेपालको आयोजनामा प्रथम जीतपुरसिमरा क्रिकेट कप संचालन भएको छ । प्रतियोगितामा जिल्ला क्रिकेट संघ मकवानपुर, जिल्ला क्रिकेट संघ पर्सा, जिल्ला क्रिकेट संघ बारा र आयोजक टिमसहित कुल ६ टिमको सहभागिता रहने आयोजकले जनाएको छ ।
उद्घाटन कार्यक्रममा बोल्दै जितपुरसिमरा उपमहानगरपालिकाका नगर उपप्रमुख भोलाप्रसाद अधिकारीले खेलकुद क्षेत्रको संरक्षण र प्रवद्र्धन गर्ने दायित्वअनुसार प्रथम जीतपुरसिमरा क्रिकेट कपको आयोजना गरिएको बताए । ‘खेलकुद, विभिन्न रचनात्मक भूमिका र सकारात्मक क्रियाकलापमा युवाहरूलाई जागृत गराउन जरुरी छ’, उनले भने ।चैत ३ गते देखि सुरु भएको प्रतियोगिता चैत १० गते सम्म औराहा स्थित सेजको ग्राउण्डमा संचालन हुने छ ।प्रथम जीतपुरसिमरा क्रिकेट कपको संयोजक सोमलामा बम्जनको सभाध्यक्षतामा सुरु भएको कार्यक्रममा त्रिलोक बिक्रम साह ठकुरी लगाएतले शुभकामना मन्तब्य राखेको थियो ।
उक्त उद्घाटन कार्यक्रममा जीतपुरसिमरा उपमहानगर वडा न ३ कि कार्यावाहक वडाध्यक्ष माया बिक,वडा न १४ की वडाध्यक्ष चयन गुरुङ्ग,वडा न १५ का वडाध्यक्ष रामप्रसाद लामिछाने,अभियान नेपालकी अध्यक्ष लक्ष्मी तिमल्सिना लगाएत स्थानीयहरुको उपस्थिति रहेको थियो । त्यस्तै शनिवार भएको खेलमा पर्सा क्रिकेट क्लब बिरगंजले जीतपुरसिमरा क्रिकेट क्लबलाई ७७ रनले पराजित गरेको छ ।१३७ रनको लक्ष्य पाएको जीतपुरसिमरा चिकेट क्लबले १७ ओभरमा अलआउट हुदैं ५९ रन मात्र बनाउन सकेको थियो ।
प्रतिक्रिया दिनुहोस