काठमाडौँ : मोतीहारी–अमलेखगन्ज पेट्रोलियम पाइपलाइनबाट गएको डिसेम्बर महिनामा मात्रै १० करोड लिटर डिजेल आयात भएको छ ।पेट्रोलियम पाइपलाइन सञ्चालनमा आएपछि ७७ करोड ८० लाख ९३ हजार लिटर (७ लाख ७८ हजार ९३ किलोलिटर) आयात भएको पाइपलाइन परियोजनाका प्रोजेक्ट म्यानेजर भरत रेग्मीले जानकारी दिए । यसमध्ये डिसेम्बरमा मात्रै १० करोड लिटर आएको उनको भनाइ छ ।
‘डिसेम्बरमा पाइपलाइनबाट औसत प्रतिघण्टा २४० किलोलिटरका दरले डिजेल प्रवाह भयो । यसअनुसार एक महिनामै पहिलो पटक १० हजार लिटर (एक लाख किलोलिटर) आयात भएको छ,’ निगमको प्रदेश २ प्रादेशिक कार्यालय बारा अमलेखगन्जका प्रमुख रेग्मीले भने । यसअघि पाइपलाइनबाट प्रतिघण्टा दुई सय किलोलिटर आयात गर्न गाह्रो थियो । अहिले २४० किलोलिटरसम्म आयात भएको निगमले जनाएको छ । पेट्रोलियम पाइपलाइनबाट २०७६ भदौ २४ देखि औपचारिक रूपमा डिजेल आयात सुरु भएको हो ।
अमलेखगन्जमा निगमको २० हजार किलोलिटर क्षमताको ट्यांक छ । पाइपलाइनबाट आयातित डिजेल त्यहीँ भण्डारण गरिन्छ । त्यहाँबाट काठमाडौं, भैरहवा, विराटनगर, जनकपुरलगायत क्षेत्रमा पठाइन्छ । अमलेखगन्जमा मौज्दात क्षमता कम भए पनि स्थानीय खपतका अतिरिक्त अन्य डिपोमा पनि पठाउने गरिन्छ ।
पाइपलाइनबाट डिजेल आयात सुरु भएसँगै चुहावट नियन्त्रणमा सहयोग पुगेको निगमले जनाएको छ । ट्यांकरबाट हुने प्रदूषण तथा वातावरणमा पुग्ने क्षति, भन्सार नाकामा हुने सवारी जाम र हडतालको मारबाट पनि मुक्त भएको निगमको दाबी छ ।
निगमका अनुसार पाइपलाइनबाट डिजेल आयात सुरु भएपछि एक वर्षमै एक अर्ब ७६ करोड रुपैयाँ बचत भएको छ । मासिक औसतमा १४ करोड ७० लाख रुपैयाँ बचत हुन्छ । सुरक्षाका दृष्टिले उच्च जोखिम रहेको भारतीय आयल कर्पोरेसनको रक्सौल डिपो जनवरी १५ बाट बन्द हुने भएको छ ।
