बैशाख १४ इन्डियन प्रिमियर लिग (आईपीएल) को ४४ औं खेलमा चेन्नई सुपर किंग्समाथि मुम्बई इन्डियन्सले ४६ रनको सहज जित निकालेको छ । यो जितसँगै मुम्बई अंक तालिकामा दोस्रो स्थानमा उक्लिन सफल भएको छ । चेन्नईस्थित एम चिदामबराम स्टेडियममा मुम्बईले दिएको एक सय ५६ रनको लक्ष्य पछ्याएको चेन्नई १७.४ एक सय ९ रनमा समेटिएको थियो । सुरेश रैनाको कप्तानीमा उत्रिएको चेन्नईका लागि विजय मुरालीले सर्वाधिक ३८ रन बनाए । कप्तान महेन्द्र सिंह धोनी अस्वस्थ भएपछि रैनाले चेन्नईको कप्तानी सम्हालेका थिए ।
मिचेल स्टाननरले २२ र ड्वाने ब्राभोले २० रन बनाए । अन्य ब्याट्सम्यानले दोहोरो अंकको रन जोड्न सकेनन् । चेन्नईलाई सस्तैमा समेट्न मुम्बईका लाथिस मलिङगा एक्लैले चार विकेट लिए । कुर्नाल पाण्ड्या र जस्प्रित बुम्राहले दुई दुई तथा अनुकुल रोए र हार्दिक पाण्ड्याले एक एक विकेट झारे ।
त्यस अघि चेन्नईमा टस हारेर पहिला ब्याटिङको निम्तो पाएको मुम्बईले निर्धारित २० ओभरमा ४ विकेटको क्षतिमा १ सय ५५ रन बनाउन सक्यो । मुम्बईका लागि कप्तान समेत रहेका ओपनर रोहित शर्माले ४८ बलमा ६ चौका र ३ छक्का प्रहार गर्दै ६७ रनको योगदान दिए । रोहितलाई १७ ओभरको दोस्रो बलमा मिचेल सान्टनरले मुरली विजयीबाट क्याच आउट गराए ।
अर्का ओपनर इभिन लुईसले ३० बलमा ३ चौका र १ छक्का सहित ३२, क्विन्टन डी कक १५ र कुनाल पान्ड्या १ रनमा आउट भए । तल्लोक्रमका हार्दिक पान्ड्या २३ र काइरन पोलार्डले १३ रनमा अविजित रहे । हार्दिकले १८ बलमा समान १ चौका र छक्का प्रहार गरे ।
चेन्नईका मिचेल सान्टनरले २, इमरान ताहिर र दिपक चाहरले समान १ विकेट लिए । चेन्नईको कप्तानी आजको खेलमा सुरेश रैनाले गरेका छन् । योसँगै मुम्बई ११ खेलमा ७ मा जित र ४ मा हारका साथ दोस्रो स्थानमा उक्लिएको छ । चेन्नई १२ खेलमा ४ मा हार र ८ मा जितका साथ शीर्ष स्थानमा छ । दिल्ली ११ खेलमा ७ मा जित र ४ मा हारका साथ तेस्रो स्थानमा झरेको छ ।
प्रतिक्रिया दिनुहोस