१०४ पाठक संख्या काठमाडौँ– आईसीसी टी–२० विश्वकप एसिया क्षेत्र फाइनल छनोटमा नेपालले विजयी सुरुवात गरेको छ ।आज काठमाडौँको कीर्तिपुरस्थित टीयू क्रिकेट मैदानमा भएको खेलमा सिंगापुरलाई ८ विकेटले हराउँदै नेपालले विजयी सुरुवात गरेको हो ।जितका लागि १ सय ४६ रनको विजयी लक्ष्य पछ्याएको नेपालले १६ ओभर ३ बलमा २ विकेटको क्षतिमा लक्ष्य पूरा गर्याे ।
नेपालका ओपनर कुशल भुर्तेलले सर्वाधिक ७४ रनको अर्धशतकीय इनिङ खेले। यस्तै, रोहित पौडेलले ३५, आशिफ शेखले २७ रन जोडे । सिंगापुरका लागि अनन्त कृष्ण र अक्षय पुरीले १–१ विकेट लिए ।
त्यसअघि टस जितेर पहिले ब्याटिङ गरेको सिंगापुरले निर्धारित २० ओभरमा ९ विकेटको क्षतिमा १४५ रन बनाएको थियो ।सिंगापुरका रोहन रंगराजनले सर्वाधिक ४६ रन बनाए । यस्तै, आर्यवीर चौधरीले ३७, मानप्रित सिंहले २४ तथा अक्षय पुरीले १३ रन जोडे ।
नेपालका करण केसीले तीन तथा सन्दीप लामिछाने, गुल्शन झा र अभिनाश बोहराले दुई–दुई विकेट लिए ।नेपालले आयोजना गरेको टी–२० विश्वकपको एसिया छनोटका खेलहरू त्रिवि मैदानका साथै मूलपानी क्रिकेट मैदानमा हुनेछन् । समूह चरणमा नेपालले सबै खेल कीर्तिपुर मैदानमा खेल्नेछ । कात्तिक १९ गतेसम्म चल्ने प्रतियोगितामा ८ देश सहभागी छन् । जसअन्तर्गत समूह ‘ए’ मा नेपालसहित सिंगापुर, ओमान र मलेसिया छन् । समूह ‘बी’ मा यूएई, बहराइन, हङकङ र कुवेत छन् । नेपालले दोस्रो खेल भोलि मलेसिया र कात्तिक १६ गते ओमानसँग खेल्नेछ ।
प्रतिक्रिया दिनुहोस